文:MenClub 魏文青  
POSTED ON 29 May 2023

雖然近排AI話題似乎稍為冷卻,但市面上「流通」嘅AI生成「美女圖片」就越黎越多,例如早前於日本Twitter瘋傳嘅「性感低胸天氣主播」就曾經呃到唔少網民,甚至有人拎啲相去啲「尋人Group」到希望搵到「真人IG」黎慢慢欣賞。而最新一期嘅日本《週刊Playboy》亦作出破天荒嘗試,就係首次刊登咗AI生成嘅寫真圖片!

曾一度瘋傳的「低胸女主播」AI生成圖。最大破綻在於背景中嘅地圖及文字

卻說為咗迎合「AI美女圖」嘅年代,《週Play》最新一期中就加入特別嘅《AI Playboy》專題,分析AI美女圖嘅優勢及使用方法等。據佢哋指出,「AI美女圖」有「自由決定使用昭和、平成、令和寫真風格」、「自由選擇寫真拍攝地點」以及「自由選擇模特兒身型」等三大優勢。亦搵黎AI生成圖片職人「Matsu」,嘗試製作雜誌有史以來第一位「AI生成模特兒」以及相應嘅「AI生成寫真」。

據Matsu指出,由於目前嘅AI大都係外國編寫,所以即使佢用咗超過50個「Prompt (提示詞)」,生成出黎嘅美女圖好多時都唔太似日本人,更唔好提有時會出現三隻手等奇怪圖片。再加上要生成適合嘅表情、甫士。所以最後佢用咗一個星期、前後生成咗3000張相,先分別得出「清純正統」、「狸貓系可愛」以及「美人系姐姐」三組照片。

而最後,《週Play》編輯部就選擇咗「狸貓系可愛」登上今期雜誌,佢哋更為「相中人」設定為一位叫「五月愛 (Satsuki Ai)」嘅17歲少女,並將其生日定為5月29日,成為雜誌史上首位AI寫真女星。或者,呢個就係未來?