文:MenClub 魏文青  
POSTED ON 10 Mar 2023

隨住人工智能近月大爆發,相信各位或多或少都睇過由AI生成嘅美女圖片。而日本AI藝術創作者「Artoid XYZ (@Artoid_XYZ)」早前更成功將「圖片」變成「影片」——大家有冇諗到啲好令人期待嘅用法?

Artoid XYZ由一月起,就已經於Twitter上發佈佢用Stable Diffusion製作嘅美女圖片,齋睇相其實已經非常養眼。但佢於本月初時,先利用AI生成同一個人物嘅開眼、眨眼嘅圖片,再利用Photoshop將圖片連接,成為一段「美女眨眼片」,最後再利用軟件「Depth」加入手持鏡頭搖動嘅效果,結果就成為咗大家見到嘅呢幾條片。

Artoid_XYZ製作嘅其他AI美女圖

特別一提嘅係,雖然大家可以從完全唔郁嘅頭髮、衣服、肢體判定圖中人為AI生成圖片,但比起就咁一張圖,其真實性已經大幅提升。而且除咗鏡頭搖動為後期加入,以及啲圖係由AI生成之外,呢啲片嘅製作方法同一般動畫其實冇咩分別,換言之,只要有心有時間,絕對可以令圖中人物做出比起貶眼更複雜嘅動作,而且因為圖片係由AI生成,所以人物可以非常靚、非常像真。所以唔少網民都留言,唔使幾耐呢啲片就會達到分別唔到真假嘅程度,亦有人表示,非常期待見到「人工智能AV」出現嘅一日。