文:MenClub 魏文青  
POSTED ON 09 Aug 2021

歌詞有云:相愛很難。就因為好難,所以啲乜乜「語錄」先咁多人睇,希望能夠從中獲得經營一段成功關係嘅方法。不過計我話,信啲唔知邊個寫嘅「語錄」就不如信心理學家,美國兩性學者Justin Lehmiller日前就與作家兼心理學家Gary Lewandowski博士進行咗一次Podcast對話,最後整理出四個「經營成功關係的重點」。

不要過度奉獻

要為愛人奉獻係其中一個最常見嘅「感情建議」——有時仲會係以「對方唔將你放喺第一就飛咗佢」嘅形式流傳於世上——不過根據Dr. Lehmiller及Dr. Lweandowski兩位心理學嘅建議,過度奉獻 (忽視個人需要,又或犧牲對個人而言極為重要嘅嘢),又或者單方面嘅奉獻,其實對段關係有不良影響。唯有雙方都有適當嘅奉獻,先會得出一段成功嘅關係。

不要有條件地愛

唔少人認為一段感情關係中,就係要令對方進步,甚至會認為「如果你愛我,就應該要做到某樣嘢」,簡單啲黎講就即係希望對方變成你認為嘅「最好」,否則對方就唔值得你愛。但兩位心理學家就認為,呢種有條件嘅愛,更多時候係對段關係造成傷害,一來強逼對方去做啲佢唔想做嘅嘢,更多係會激起反抗;二來利用感情 (或性) 去懲罰或者獎賞對方,本身都唔係令對方進步嘅好方法。

不要失去自己

曾幾何時有句網上名言係「感情唔係1+1=2,係0.5+0.5=1」,似乎就代表一旦進入一段關係,你同對方就要無時無刻一齊,做所有嘢都要以一個「組合」形式進行。但兩位心理學家就認為如果於關係中完全失去個人生活,其實都係件唔健康嘅事。一來係因為缺乏個人空間反而會激起「自我探索」嘅需要——亦係點解處於「完美關係」嘅情侶更傾向出軌;二來係當兩個人無時無刻都一齊,就會失去「掛念」嘅心情,當一切都變得理想當然,情感上嘅連結反而會變弱。

不要逃避爭執

唔少男士都好怕與另一半爭執,一來因為覺得爭執好煩,二來係唔少男人都有「不能與女人講道理」嘅偏見,於是一見苗頭不對就使用「是但無所謂你話事」嘅態度,希望「息事寧人」。不過據兩位心理學家講,「稍為爭執」其實係好過「完全唔爭執」。事關「將會發生爭執」就代表兩個人之間有問題;如果真係「發生爭執」,代表起碼有一部份問題能夠解決;但「逃避爭執」就即係完全無解決過個問題,最後問題仲可能於大家心中越滾越大。

資料來源:Lehmiller.com