文:MenClub 魏文青  
POSTED ON 24 Sep 2020

作為男士,相信大家都有睇AV,亦相信大家唔會「眼看手勿動」,而一直都有報導指大家呢個「眼看手又動」嘅習慣會影響你同伴侶之間嘅關係,但知名性學家Dr. Lehmiller就於個人網站上指,呢啲報導好多時都搞錯咗「有關係」同「有因果關係」嘅分別,而且佢引用一個加拿大及美國研究指,其實睇AV與關係滿足度基本上係冇關係。

Dr.Lehmiller指過去嘅研究通常係叫人回憶過去一段時間觀看AV嘅習慣及對關係嘅滿足度,問題係人嘅記憶其實非常唔準確,導致紀錄嘅數據本身就有問題,另外亦冇辦法確切知道究竟係「睇AV令關係滿足度低」定「因為滿足度低先去睇AV」。而《Pornography use and romantic relationships》呢個研究就改為要求參與者以日記方式紀錄成人內容 (包括任何描述與性行為相關嘅相、片、字、聲)接收情況,以及當日嘅關係滿足度,研究人員就可以睇得出「今日接收成人內容」會否影響「後一日嘅關係滿足度」,又或者「今日嘅關係滿足度」會唔會影響「聽日嘅成人內容接收情況」。

咁結果係咩呢?好簡單講就係「接收成人內容」與「關係滿足度」基本上毫無因果關係,反而與當日嘅性行為意慾有關係。例如研究發現不論處於異性關係或同性關係嘅女性,又或處於同性關係嘅男性,只要有接收成人內容,當日就會更有意慾與伴侶進行性行為;而如果係異性關係中嘅男性有接收成人內容,對佢嘅意慾冇影響,但佢伴侶嘅當日意慾就會較低。

但由於研究係冇紀錄「知唔知對方接收成人內容」,亦冇確實地知道事情發生順序,所以冇辦法知道究竟係因為「伴侶意慾低所以我去接受成人內容」定「我接受成人內容,對方知道令意慾降低」。研究能夠肯定嘅,就係「前一日接受成人內容」與「後一日雙方對關係嘅滿足度」無統計學上嘅關係。

資料來源:lehmiller.com