文:MenClub 魏文青  
POSTED ON 11 May 2022

智能電話黎講,有人鍾意用iOS,有人鍾意用Android,過往亦有研究指出揀唔同平台,可能會代表住不同嘅性格、行為特點。而近日外國汽車保險公司「Jerry」就做咗個研究,分析iOS及Android用家嘅駕駛態度,結果就發現,Android用家喺各方面都完勝iOS用家,從而得出「Android用家係更好嘅道路使用者」結論。

圖片:Jerry

Jerry分析近2萬名駕駛者、總計超過1300萬公里路程上嘅駕駛行為,然後再將呢啲行為轉為評分,結果就發現Android用家不論於整體安全、駕駛專注、以至速度、轉向、加速、煞車等方面嘅評分都完勝iOS用家。其中兩者最大嘅差別在於駕駛專注,Android用家為74分,iOS用家為68分,表示Android用家更少於駕駛時分心去撳電話。

Jerry指出,一般認為年齡、性別、婚姻狀況、教育水平以及信用評級等會影響駕駛者嘅駕駛行為,例如已婚駕駛者會比單身駕駛更為安全、年長駕駛者又會比年輕駕駛者更安全,但只要佢係一名Android用家,佢嘅駕駛安全評分就會比同類iOS用家較高,例如以教育程度而言,由高級文憑去到PhD,Android用家嘅評分都高於75分,但iOS用家讀到PhD都只係得72分。

圖片:Jerry

Jerry指出,固中原因可能係因為兩方用家有不同性格特質。過往有研究指出,Android用家都傾向更守規矩、更誠實,而iOS用家就較為情緒化,較難去預計佢哋嘅行為。帶落駕駛之上,或者就會令佢哋嘅加速、煞車、轉向動作更突然,車速亦更高,於是安全評分就會較低。

資料來源:Jerry