文:MenClub 艾力克  圖:互聯網
POSTED ON 11 Jun 2021

隨著近年環保意識抬頭,加上科技發展突飛猛進,運輸行業積極能源轉型,除咗近年非常流行嘅電動車之外,外國就有公司研發緊電動客機,而全球第一艘電動貨輪亦預計喺今年年底正式啟航。呢部由挪威公司Yara International所生產嘅貨輪,唔單只係用電力驅力,更具備自動航行功能,能夠喺無人控制情況下完成航行、停泊、起錨等工作,大幅減低人工成本。

呢部自動航行電動貨輪名為「Yara Birkeland」,全長80米,寬15米,載貨量為120TEU(即可以運載120個20呎標準貨櫃),對比起載運量閒閒哋突萬幾兩萬TEU嘅國際貨輪,呢部貨輪就相當迷你,主要用作國內港口間運輸。

雖然「Yara Birkeland」相對迷你,但要推郁呢隻船就需要用上容量高達7MWh電池組,相等於100部Tesla Model 3電池。主要由兩組全向螺旋槳(all direction propeller)推動,分別輸出各900kW動力,另外船艏推進器(Bow Thruster)亦為兩側提供各700kW轉向力,係「環保模式」下,船速可達可達12km/h,極速模式就可以去到24km/h。

由於船上配備雷達、光學雷達、紅外線攝影機(IR camera)以及自動識別系統(AIS),能夠喺無人控制情況下完成停泊及起錨,而且船隻會由三個資訊中心密切監控,確保萬無一失。不過由於鋰電池續航能力有限,呢部貨輪只可以喺挪威三個主要港口來回,全程30海哩。

資料來源:electrek