文:MenClub 魏文青  
POSTED ON 31 Mar 2021

雖然路面上仍然係以汽油車居多,但相信唔少人都深信電動車會成為可見將來嘅主流——而呢到嘅「唔少人」絕對唔係單指瞓身Tesla股票嘅「股東們」,而係講緊德國福士集團汽車 (Volkswagen),因為根據意外流出嘅情報,福士會將其美國分公司個名改做「Voltswagen」!

設計圖片

雖然呢個公佈日同愚人節非常接近、雖然呢個消息會令人諗起早前台灣嘅「鮭魚」改名熱潮,但據CNBC報導,福士改名「Voltswagen」係千真萬確嘅消息。據報CNBC記者於美國時間星期一下午發現福士官網發佈咗份新聞稿,話5月1日福士集團美國分公司就會改名做「Voltswagen」,但隨後該新聞稿就被取下。CNBC記者隨即向知情人士查詢,知情人士就話改名係真,只係本身諗住4月29日先公佈,點知錯手放咗上網,所以唔係愚人節玩笑黎。

圖片:Volkswagen

據CNBC轉述新聞稿指,改名係為咗「公開展示公司未來對電動交通的投入」,並詳細地指品牌未來推出嘅電動車車身都會有「Voltswagen」徽章,而且會用上淺藍色嘅「VW」圓形標誌,而汽油車就只會保留圓形「VW」標誌,而且係深藍色。去年福士集團亦改用新標誌設計,代表公司轉向電動車發展。

不過由於CNBC只掌握到部份新聞稿內容,而福士集團方面亦未有公開回應,所以最終係咪真係改名都要等到官方宣佈先能夠肯定。

資料來源:CNBC