Nike 同 Sacai 嘅 Crossover 鞋款系列有幾搶手我相信唔需要多講,以「雙剔」為一大賣點嘅鞋款又再次回歸!而最新一對 Nike Crossover Sacai 仲搵埋設計師 Jean paul gaultier 合作,發表嘅新鞋仲加入咗代表一代人回憶嘅「woven 編織」設計。
![](https://cdn.menclub.hk/data/attachment/object_pic/2023/11/17/96161104b8edda834ef3e160e2de0b2b.jpg)
最新嘅 Nike X Sacai X Jean paul gaultier 聯乘鞋款就延續咗 Sacai 先前幾次對於 Nike 經典嘅 LDV 同 Daybreak 鞋款,加上「雙剔」同加長中底長度等解構性設計,而今次嘅Crossover系列仲以 Woven 編織技術打造鞋面,令鞋面睇落更具前衛性之餘,亦勾起一代男士嘅「Woven回憶」。
![](https://cdn.menclub.hk/data/attachment/object_pic/2023/11/17/31e5c15e6011963a1accdd37f7cb4217.png)
一提起Nike Woven 嘅編織技術,好多男士都會記得大約係十年前 Woven 係唔少人心目中嘅「鞋王」。之不過 Woven 技術有咩咁特別?其實 Nike Air Woven 早喺2000年已經出現,當時設計師 Mike Aveni 參考咗古時候以尼龍線編織而成,唔需要剪裁同縫紉,輕身又貼合腳面嘅草席涼鞋,繼而設計出 Nike Air Woven 波鞋,只不過呢批鞋剛剛登場時因為沉悶嘅顏色令Woven 鞋款並不太受歡迎。
![](https://cdn.menclub.hk/data/attachment/object_pic/2023/11/17/fd65384f6dfd03e630665c18877ab3c5.jpeg)
到咗 2002年,日本潮流教父藤原浩重新設計呢對鞋,佢巧妙地以多種不同顏色嘅條子編織出「彩虹色」嘅 Woven,大大提高鞋款嘅吸引度同視覺效果,獨特外形,加上當時有陳冠希同Bill Murray 等名人嘅加持之下,奠定咗 Air Woven 係潮流界嘅鞋王地位。
![](https://cdn.menclub.hk/data/attachment/object_pic/2023/11/17/a754db3dfd81e974848820d1668ffa6f.jpeg)
今次 Nike X Sacai X Jean paul gaultier 聯乘系列增添嘅 woven 編織設計,令鞋款有更多變化之餘,仲勾起一代人嘅「編織回憶」,唔知有幾多人會因為對 Woven 嘅情意結,而入手呢對鞋款呢?
![](https://cdn.menclub.hk/data/attachment/object_pic/2023/11/17/0bb99390c10f4f40566833b2b49c9c6a.jpg)