文:MenClub 波特先生  圖:互聯網
POSTED ON 20 Mar 2022

近日因為俄烏戰爭關係,連帶作為俄羅斯人嘅車路士老闊艾巴莫域治都受牽連,其中英超正迫使呢位班主賣掉球隊,對此艾巴亦只能夠無奈配合。對此,有唔少有興趣嘅人士已開始著手收購車路士,其中就包括車仔前傳奇球員泰利。

據最新消息指,前車路士中堅兼隊長泰利,就有意收購車路士10%股份。不過,事實上今次收購有傳係透過一個叫「真藍」嘅組織,而呢個組織其實只係一個社區計劃籌集資金,換句話講其實就只係「眾籌」,計劃係歡迎球迷投入至少100英鎊去支持組織,目標係希望籌得2.5億歐元去收購車路士10%股份。

而泰利就只係計劃當中嘅其中一位參加者,呢位隊長嘅加入相信令計劃更加具可信性及實行性,而唔單止泰利,據知目前包括車路士球場擁有者、車路士球迷信托基金都已經相繼加入此計劃。

其實相信球迷們都知道,泰利係非常深愛住車路士,所以今次泰利支持計劃亦絕對係可預計之中,能夠成為車路士班主嘅其中之一,絕對係泰利最大嘅夢想之一。不過,究竟最終車路士係咪真係讓「真藍」組織收購其10%股份,就仍屬未知之數。