文:MenClub 艾力克  
POSTED ON 08 Jul 2021

雖然2018年世界盃冠軍、熱門勁旅法國隊喺歐國盃16強爆冷出局,但隊中球星基沙文(Antoine Griezmann)同迪比利(Ousmane Dembélé)最近就成為眾人焦點。皆因兩人被爆出2019年曾經拍過一條片嘲笑日本酒店職員「樣子醜陋」、「技術落後」,而引起種族歧視爭議。事情更燒到去兩人所屬嘅球會巴塞隆拿,球會贊助商樂天集團總裁「三木谷浩史」公開譴責,足球遊戲《PES》開發商KONAMI亦宣布同基沙文終止合作。

據了解,條片係2019年巴塞隆拿去日本嗰時拍低,當時基沙文想玩足球遊戲《PES》,但部電視就壞咗所以叫酒店職員上門維修。期間迪比利就話「你叫啲咁醜樣嘅人嚟,就係為咗有得打機,你唔覺得羞耻咩?」,之後佢聽到職員細細聲用日文溝通,又話「呢啲係咩落後語言,佢哋國家科技發達咩?」雖然基沙文喺片中只係笑笑口冇出過聲,但就因為冇阻止迪比利發表「偉論」而遭網民炮轟種族歧視。

雖然兩位球星同巴塞隆拿球會好快就出文道歉,但網民就唔多唔接受,繼續狙擊。隨住事情愈演愈烈,巴塞隆拿贊助商樂天集團總裁「三木谷浩史」就喺Twitter公開譴責歧視行為,表示「作為球會贊助商及巡迴賽組織者,有關巴塞隆納球員發表歧視性言論,我感到非常失望」同時強調呢種言論喺任何情況下都不能接受,已經向球會抗議並要求佢哋解釋。

除咗樂天集團之外,遊戲開發商KONAMI亦係巴塞隆拿合作商之一,旗下足球遊戲《Pro Evolution Soccer》更係獨家獲得巴塞隆拿授權。不過因為爆出歧視爭議,KONAMI就宣布解除基沙文擔任遊戲王(Yu-Gi-Oh)形像大使合作,至於《PES》嘅特許經營權會唔會凍過水,就要睇巴塞隆拿點樣解釋。

資料來源:euronews