文:MenClub 魏文青  
POSTED ON 23 Mar 2023

《Elden Ring》自去年2月推出之後就成為現象級遊戲,除咗早前銷量突破2000萬套之外,去年更拎埋The Game Award嘅年度遊戲,到依家就算推出超過一年,Steam上每日都有數以萬計嘅人繼續玩緊。而發行商Bandai Namco早前亦發佈遊戲內嘅「死亡數據」統計,顯示玩家總死亡次數已經突破90億次,比全球人口都仲要多。

Bandai Namco早前於官網上發佈咗《Elden Ring》玩家嘅死亡統計數據圖,當中顯示全球玩家於遊戲內嘅總死亡次數已經突破90億次,粗略計算就即係每個玩家平均死咗450次。而眾多「死因」之中,被敵人或NPC殺害嘅最多,佔69%,其次就係中毒、猩紅腐敗等特殊狀態,佔15%,而被其他玩家入侵殺死嘅就只佔2%。特別要提嘅係,因地形跌死嘅次數只佔14%,可見「英高嘅善意」其實都算係手下留情。

而全球玩家亦總共進行過59億次Boss戰,其中被挑戰最多嘅就係「女武神」瑪蓮妮亞,達3.29億次,比起完成遊戲初期必須經過、號稱新人殺手嘅「惡兆 瑪爾基特」(2.81億次)、最終Boss「拉達岡」(1.48億次),以及遊戲一開始就棟喺大家面前「引誘」你去打佢嘅大樹守衛 (2.77億次) 都要多。考慮到瑪蓮妮亞並非主線必經Boss、而遇到佢時角色又應該頗為高level,可以想像每個玩家挑戰佢嘅玩家,應該都死咗好多次。

資料來源:Bandai Namco