文:MenClub 魏文青  
POSTED ON 08 Mar 2023

由Keanu Reeves主演,並加入澤山璃奈、真田廣之、Marko Aguad,以及近來因為接受外媒訪問而成為熱話嘅甄子丹嘅《John Wick 4》即將於3月23日上映,而片方亦於昨日,喺美國舉行咗首場媒體試映,結果媒體評價一片激讚,特別係有唔少人提到電影雖然頗長,但連番動戲場面令人目瞪口呆。

縱觀美國媒體及劇評人士嘅觀後感,《John Wick 4》嘅主要特點為「長但緊湊」同埋「劇情麻麻地」。當中接近3個鐘嘅電影時長幾乎係每篇評論都會提到,有部份人就覺得電影稍為拖沓,但大部份人都認為導演Chad Stahelski於電影中塞入大量精彩刺激而且有創意嘅動作場面,加上剪接節奏掌握得當 (即係「緊湊」嘅部份)、Dan Lausten (攝影指導) 嘅精彩鏡頭調度,所以就算睇咗三個鐘都唔會令人感到沉悶。

而另外一個共通點,就係唔少評論都指電影劇情「有啲蠢」、「荒謬」、「打機咁」、「去到結尾一片混亂」,但大部份媒體亦同時指出,套戲本身就唔係賣劇情,「劇情完全可以忽視」。

《Collider》總編輯Steven Weintraub

《CinemaBlend》副總編 Eric Eisenberg

《Collider》專題編輯宋蕾蕾

獨立影評人Erick Weber

另外香港影迷們最關心嘅,大概就係「宇宙最強」甄子丹於電影中嘅表現。而外國劇評就一致高度贊揚甄子丹,盛讚佢「一如以往地乾淨俐落」、「帶來他的最強水平」,甚至有人高呼「甄子丹才是MVP」。

另外值得一提嘅係,有傳媒睇完之後,以「大膽刺激的系列完結篇(應該係掛?)」黎形容《John Wick 4》,但因為不能公開劇情細節,所以目前冇人過透露戲中一眾角色嘅關係與結局。換言之,如果大家想睇下仲有冇《John Wick 5》,定係Keanu Reeves點樣打爆甄子丹,就要自己入場睇啦。