文:MenClub 艾力克  
POSTED ON 28 Feb 2023

講咗好耐嘅《Pokémon Sleep》終於確定今夏推出,等玩家能夠邊瞓邊捉小精靈,期待每一日起床。

《Pokémon Sleep》玩法非常簡單,玩家只要喺個App Set好鬧鐘,再將電話放喺床邊入睡,程式就會測量、紀錄及分析玩家睡眠狀態,並判定為「淺淺入夢」、「安然入睡」,以及「深深入眠」三種睡眠類型其中一種,隨後相同睡眠類型嘅Pokémon就會慢慢聚集到App內嘅卡比獸身邊,玩家起身時就可以欣賞Pokémon們可愛睡姿,而且每款Pokémon睡姿都唔同,例如小呆獸會憨憨睡、比卡超會垂耳睡、小鋸鱷會單眼睡等等。

與此同時,官方亦宣布推出全新配件「Pokemon Go Plus +」,只要喺睡前及睡醒時撳下精靈球上嘅按鍵,便可蒐集睡眠資料。另外,呢個配件亦可以連結手機遊戲《Pokémon GO》,玩家無須查看電話,就能夠捕捉到寶可夢及旋轉補給站,預計7月中上市。