文:MenClub 魏文青  
POSTED ON 16 Jan 2023

要數近年港產電影中,單睇個演員名單就已經能令人興奮嘅,大概就要數翁子光導演及編劇、梁朝偉及郭富城主演嘅《風再起時》。而近日網上就流出《風再起時》嘅中國版海報,上面大大隻字寫住2月17日上映,而消息亦指電影嘅香港地區發行商美亞電影確認,香港都係同步上映。換言之大家於情人節檔期就可以睇到兩大影帝於大銀幕上嘅首次合作。

卻說日前網上流出一張《風再起時》嘅中國地區海報,上面除咗有郭富城及梁朝偉二人嘅大頭側面之外,最重要嘅就係透露咗《風》嘅上映時間係2月17日。而據Facebook專頁 《電影與娛樂盛事 Movie & Event Marketing》指出,美亞電影確認《風》會於香港同步上映,換言之都係2月17日。

《風再起時》以「四大華人探長」為藍本,郭富城及梁朝偉分別飾演「磊樂」及「南江」。翁子光早前接受訪問時曾提到:「電影強調時代更替,風格帶有詩意,有別傳統追求官能刺激的警匪片,反而著墨於怎樣看香港這個地方,以及香港人的心態。這是個百分百香港故事,充滿年代感,富有特別情懷的電影。」

資料來源:電影與娛樂盛事 Movie & Event Marketing