文:MenClub 艾力克  
POSTED ON 20 Sep 2022

改編自超人氣同名漫畫,由集英社及MAPPA攜手製作嘅《鏈鋸人》昨晚公開正式預告及片頭曲。打鬥場面精彩,作畫水準極高,絕對有望成為下半年度最紅動畫!

從預告可見,除咗魔特異第4課多位成員,故事早期嘅蝙蝠惡魔及水蛭惡魔亦相繼現身,精彩流暢嘅打鬥畫面,配上米津玄師獻唱嘅主題曲《KICK BACK》真係睇到人熱血沸騰。

除此之外,官方同時宣布每一集片尾曲都會由唔歌手或團體演唱,當中包括ano、Eve、Aimer、Kanaria、Syudou、女王蜂、ずっと真夜中でいいのに。、TK from 凛として時雨、TOOBOE、Vaundy、PEOPLE 1等等,陣容相當豪華。第一季預計有12集,10月11日正式播出。

《鏈鋸人》由日本漫畫家藤本樹創作,故事講述貧窮少年淀治為償還亡父巨債拼命工作,絕望之際與鏈鋸惡魔波奇塔結合,成為雙手同個頭都可以變成電鋸既「鏈鋸人」,並加入政府轄下嘅「公安對魔特異課」幫忙獵殺惡魔。黑暗獵奇風格加上意想不到嘅劇情轉折,吸引大量Fans觀看。