文:MenClub 魏文青  
POSTED ON 09 Aug 2022

唔知大家有冇發現,當你年紀越來越大,你對於某啲嘢係「新」定「舊」嘅標準就會越黎越模糊。好似《鋼之鍊金術師》呢部作品,由2001年開始連載、2010年完結,距離依家只係十年時間,雖然絕對唔算係「新作」,但話佢「舊」又好似唔太恰當。不過對於日本嘅大學生而言,原來《鋼鍊》已經係「爸爸鍾意睇」嘅漫畫!即刻覺得自己好老呀!

卻說東京工藝大學漫畫科教授伊藤剛,日前於Twitter分享佢同學生們於課堂上嘅互動。佢話,當佢問學生們第一部睇嘅漫畫係咩,學生們大多都係答《排球少年》又或《進擊的巨人》,考慮到呢兩部作品都係近十年嘅大熱之作,而且唔少成年人自己都有睇,呢個答案其實唔算出奇。出奇嘅係當伊藤剛同學生講,佢好鍾意睇《鋼之鍊金術師》嘅時候,學生們竟然話「《鋼鍊》係我爸爸鍾意睇嘅」。估唔到2001年開始連載嘅作品,喺依家嘅大學生眼中竟然已經係「上一代」嘅產物!

不過伊藤剛冷靜落黎後,就發現《鋼鍊》其實已經係超過廿年嘅作品,基本上同依家啲大學生一樣咁老。就算係《進擊的巨人》,漫畫由2009年開始、動畫由2013年開始,計返就即係依家班大學生大約9-11歲、小學四至六年級開始爆紅,的確好可能係佢哋第一部睇嘅漫畫,甚至連伊藤剛自己個仔,都係9年前小六時開始睇《進擊的巨人》,依家佢個仔都大學三年級。

伊藤剛頗有感慨咁話,「如果你覺得10年前、20年前嘅嘢都係『最近嘅事』,咁你就真係開始老啦」。