文:MenClub 魏文青  
POSTED ON 01 Aug 2022

上月中我哋曾經報導過侵權網站「漫畫BANK」位於中國嘅負責人被捕,然後被罰93萬Yen (約五萬港元) 嘅消息。當時大家都會好奇點解一個據報造成2000億日元損失嘅人,最後只係罰幾十萬Yen就算。其實就唔係唔報,只係時辰未到。角川、集英社以及小學館三大出版社,近日再向2018年被取締嘅「漫畫村」負責人星野路實 (於2019年被捕) 索償19億3000萬日元。近排成功當選日本議員嘅漫畫家赤松健亦發文指出,侵權人將要面臨「人間地獄」。

2016年成立嘅「漫畫村」曾經係最多用戶、規模最大嘅日漫侵權網站之一,據估計當時每月用戶人數接近1億,造成約3000億日元損失,更促成日本政府推出緊急對策,要求互駢網供應商封鎖網站。最後漫畫村於2018年4月被取締,2019年經營者星野路實於菲律賓被捕,再於2021年6月被福岡地方裁判所判處有期徒刑三年,罰1000萬Yen以及6200萬Yen犯罪所得。

不過當時出版社其實只係就兩部被侵權作品而求償,而角川、集英社、小學館三大出版社就召開聯合記者會,表示會再就另外17部作品進行求償,總額達到19億3000萬日元。考慮到當年「漫畫村」上嘅侵權作品數量,相信類似求償將會陸續有來。

而上月初當選日本國會議員嘅漫畫家赤松健,亦有於Twitter轉載相關新聞。據赤松健指出,依家三大出版社帶頭求償,相信一眾較小嘅出版社亦會跟隨,侵權者將要面對源源不絕嘅官司,「你將不會感到自己活著」。

資料來源:Bengo4