文:MenClub 魏文青  
POSTED ON 22 Apr 2022

講起《Call of Duty》系列,相信大家未玩過都一定聽過,而縱使遊戲已經出過N代,但玩家嘅對手都不外乎係納粹德國、共產國家、中東恐怖分子之類。但黎緊即將推出第三季嘅《Call of Duty: Warzone》就畀足新意,玩家們要打嘅甚至唔再係人,而係來自傳奇影業怪獸宇宙、地球上最出名嘅兩隻怪獸:哥斯拉同金剛!

《Call of Duty: Warzone》係一隻免費大型多人大屠殺類第一身射擊遊戲,即將於4月27日推出遊戲嘅第三季「Classified Arms」。而於4月初公佈嘅遊戲預告,由於片尾出現與哥斯拉叫聲非常接近嘅音效,所以當時就已經有人估哥斯拉係咪會加入遊戲當中。而官方今日就再推出新預告,指將於5月9日,於「Classified Arms」之上推出期間限定模式及地圖「Operation Monarch」,名字本身就係來自「怪獸宇宙」中負責監控各類怪獸嘅科學組織,而地圖上亦似乎會出現哥斯拉與金剛嘅身影。

從官方介紹黎睇,Operation Monarch嘅主要玩法都係玩家對玩家 (PvP),只係地圖上加入咗考古發掘場嘅元素以融入「怪獸宇宙」嘅世界觀。官方亦冇確定哥斯拉與金剛會於地圖上登場,有網民就於預告下留言,話希望兩隻巨獸真係會於地圖上出現,而唔係出個「哥斯拉主題武器皮膚」就算。

資料來源:Call of Duty