文:MenClub 魏文青  
POSTED ON 20 Oct 2021

依家好多人去到廿幾歲就話自己好鬼老,另一邊廂就有人去到九十幾歲都依然唔認老——講緊嘅係呢個世界最重要「老人」英女皇伊莉沙白二世。卻說早前英國雜誌《Oldie》希望向現年95歲嘅英女皇頒發「年度老人獎 (Oldie of the year)」,結果獲得女皇陛下回信婉拒,因為佢覺得自己唔老呀!

英女皇伊莉沙白二世

圖片:Wikipedia

《Oldie》係英國一本針對長者市場嘅雜誌,而佢哋每年都會頒發「年度老人獎」,以祝賀人生中有傑出成就嘅長者,過去嘅得獎者有前英國首相馬卓安 (John Major)、著名演員Olivia Mary de Havilland女爵士等。咁講到英國、有成就、仲要係長者,又點能夠唔提英國史上在位時間最長嘅英女皇伊莉沙白二世?於是今年雜誌就去信英女皇,問下佢願唔願意接受「年度老人獎」。

女皇秘書處嘅回信

圖片:The Oldie

《Oldie》於英國時間星期二就刊出英女皇秘書處方面嘅回信,信中指「女皇陛下認為一個人有幾老呢,係睇佢自己嘅感覺,所以女皇陛下認為自己唔符合你呢個獎嘅條件,無辦法接受。希望你能夠搵到個更適合嘅人選」簡單啲黎講就即係英女皇覺得自己唔係老人,所以做唔到「年度老人」呀。值得一提嘅係,英女皇已故夫君愛丁堡公爵菲臘親王,曾於2011年被《Oldie》選為「年度王夫 (Consort of the year)」,亦即特別為菲臘親王而設嘅獎項。

《Oldie》最後將今年嘅「年度老人」獎頒予現年90歲嘅美國籍演員Leslie Caron。

資料來源:The Oldie