文:MenClub 艾力克  
POSTED ON 18 May 2021

Zack Snyder喺2007年上映嘅成名之作《戰狼300》,講述300名斯巴達勇士面對實力懸殊嘅波斯大軍仍然堅毅不屈,死守溫泉關抵抗入侵,加上拳拳到肉嘅打鬥場面,簡直就係男人嘅浪漫。最近Zack Snyder就透露,其實佢一早寫好第三集《戰狼300》劇本,劇情圍繞住一段男同性戀嘅戰爭愛情故事,但華納唔收貨。

日前Zack Snyder喺Podcast節目《The Fourth Wall》透露,疫情期間佢同華納兄弟達成協議,並寫下第三集同時亦係最後一集《戰狼300》劇本,可惜被華納拒絕。Zack Snyder表示:「當我坐低動筆嗰陣,竟然寫出一部截然不同嘅電影。將以亞歷山大大帝為主角,講述佢同Hephaestion之間嘅關係,係一套愛情戰爭電影。」

Hephaestion係亞歷山大嘅右輔大臣,學者認為佢好有可能係亞歷山大嘅同性戀人。(圖片截自電影《Alexander》)

Zack Snyder繼續補充:「雖然呢個劇本唔適合成為第三集《戰狼300》,但我覺得呢個諗法好正,並稱佢為《Blood and Ashes》,一段融合戰爭與愛情嘅故事。我非常樂意將佢拍出嚟,不過華納就唔同意。你知啦,華納又唔係我嘅忠實粉絲。」

其實Zack Snyder都唔係第一次公開表示華納唔鍾意佢,前早就話過華納對佢嘅DC電影作品冇興趣,依家又話華納唔鐘意佢嘅《Blood and Ashes》劇本。不過以Zack Snyder名氣,佢大可以搵另一間片商合作。唔知大家又對男同性戀《戰狼300》有冇興趣呢?

資料來源:CBR