文:MenClub 艾力克  
POSTED ON 14 May 2021

粉紅色向來畀人一種粉嫩可口嘅感覺,每次見到粉紅色嘅嘢食都覺得特別甜,特別吸引。最近有項英國研究指出,原來相對於透明飲料,粉紅色飲料更能提升運動表現,究竟粉紅色有咩魔力呢?

最近英國西敏大學(University of Westminster)研究團隊進行咗場實驗,研究粉紅色飲料對運動嘅影響,並將結果刊登喺學術期刊《Frontiers in Nutrition》。研究員搵嚟10位有運動習慣嘅業餘跑手(6男4女),要求佢哋喺跑步機上跑30分鐘(速度就志願者自行選擇)。於跑步期間,志願者分別會以透明或粉紅色「無熱量人工甜味溶液」漱口,兩款飲料除咗顏色唔一樣之外,其餘成份全部相同。最終發現,用粉紅色飲料漱口嘅志願者,平均跑多咗212米、平均速度提升4.4%。

根據研究報告,多位志願者都覺得粉紅色飲料更甜,漱完口更開心,從而提升運動表現。研究員Sanjoy Deb就認為今次研究結果能為運動飲料以及運動領域研究開辟新全新路向。唔知大家覺唔覺得見到粉紅色嘅野會特別開心愉快,從而運動表現都好啲呢!

資料來源:sciencealertFrontiers in Nutrition