文:MenClub 魏文青  
POSTED ON 28 Jan 2021

抽蛋、課金元素於手機遊戲非常常見,近年亦有唔少家用/電腦遊戲加入「課金」元素,令玩家除咗要畀錢買Game,仲有課金購買人物、裝備先有辦法玩落去,影響玩家體驗之餘,更有可能衍行社會問題。不過亦有遊戲廠商堅拒呢種賺錢方法。例如日本大廠Capcom就於年終報告中講到明反對抽蛋。

圖片:Capcom

Capcom於年度報告中段「Capcom與社會」嘅開首談到「In-game purchases」,文中表示「起源自手機遊戲嘅抽蛋或抽獎遊戲機制,近年於日本遊戲市場引起討論」,又指有國家已經禁止遊戲出現類似機制,然後就話Capcom作為娛樂文化嘅創造者,「相信遊戲應該以本身嘅樂趣娛樂玩家,而非與贏到抽獎的刺激感掛勾。我們不想看到本應能令人們開心嘅遊戲,因為過高嘅收費而有反效果」,最後更保證「將會極力減少我們開發的手機遊戲中的抽獎機制,而家用機遊戲則會免費提供整隻遊戲嘅所有內容,輔以價格便宜嘅收費額外內容 (即係DLC)。」

圖片:Capcom

睇返過去Capcom出嘅作品,雖然都有推出DLC (例如《Monster Hunter World》) 或者加強版 (例如《Street Fighter 5》),但一來推出時間往往都係正Game推出嘅數月甚至數年後,唔影響玩家遊玩正Game嘅體驗之餘,更可以話係延長咗隻Game嘅壽命。對畀起啲唔課金就玩唔到落去嘅遊戲,都真係堪稱「佛心」。唔知今次Capcom公開表態,又會唔會能夠令遊戲界重回正軌?

資料來源: