Pixar 宣佈動畫電影《Soul》將於12月25日於中國院線上映，連同Sony嘅《Monster Hunter》、以及Warner Bros嘅《Wonder Woman 1984》，三部電影嘅中國上映日都會比美國本土戲院上映日更早。

《Soul》原定於今年6月作全球上映，但因為疫情關係而一推再推，10月時Disney及Pixar宣佈上映日定於聖誕節正日，但美國本土 (以至其他有Disney+服務嘅地方) 只會作線上播放，如無意外即係完全放棄美國本土院線。而無Disney+服務嘅地區，包括中國，就會於12月25日作院線上映。

另一邊廂，Sony發行嘅《Monster Hunter》真人電影目前仍預計會於戲院播放，但美國本土上映日為12月30日，中國、奧地利、德國、荷蘭等地嘅上映就係12月3日，早咗幾乎成個月；而早前Warner Bros亦宣佈，《Wonder Woman 1984》會於12月25日於美國直接以HBO Max作線上播放，而未有HBO Max服務嘅地方，包括中國，就會於12月16日上映。

換言之，三部電影嘅美國本土戲院上映時間，都比海外地區更遲 (或根本就唔會喺戲院上)，反映片方目前係放棄咗美國本土票房，專注以電影帶動自家串流平台嘅流量 (《Monster Hunter》仲會喺戲院上嘅原因，相信亦與Sony未有成熟嘅自家串流平台有關)，以及依賴疫情相對緩和、觀眾仍然能夠入場嘅海外地區彌補收入。假若疫情於美國持續，戲院繼續唔開，或者會改變往後電影嘅發行模式。