文:MenClub 魏文青  
POSTED ON 25 Nov 2022

隨住年齡上升,一般人嘅認知能力亦會隨之下降,而醫學界就一直希望搵到延緩、甚至阻止認知能力下降嘅方法。根據近日美國一個研究發現,原來只要畀老人家郁住黎做認知訓練,就唔單止能夠延緩退化,甚至能夠「腦力回春」,令老人家嘅認知能力反超廿歲嘅後生仔。

圖片:The Curious Case of Benjamin Button

今次研究由美國三藩市California大學Neuroscape神經學院助理教授Joaquinn A. Anguera主持,佢發現有啲人進行認知訓練時,係鍾意企起身郁住黎,而唔係坐定定咁做,於是佢就希望研究「郁住黎做」係咪有咩實質好處。佢招募咗49位平均年齡為68歲嘅老人家,將佢哋隨機分成兩組,一組由訓練員幫助下,進行為期8個星期嘅「Body-Brain Trainer」,亦即一路運動一路做認知訓練,而另一組就靠電話應用程式自行做6個星期嘅「Mind-Body Trainer」,即係坐喺到黎認知訓練。再於訓練前後進行另一組測試,以評估老人家們嘅體能以及認知能力水平。

圖片:The Curious Case of Benjamin Button

結果發現,「郁住黎做」嘅一組老人家,喺完成訓練後嘅專注能力有顯著提升,而「住喺到做」嘅一組就冇改善。更令人驚喜嘅,「郁住黎做」嘅老人家成績,比起團隊另外搵返黎嘅一班年輕人都仲要好,而且透過評測專注力時做嘅腦電圖,發現「郁住黎做」嘅老人家,腦部活躍程度同樣比年輕人要高,甚至訓練完成後一年,效果依然可以維持。

團隊指出,今次結果顯示「運動」同「認知能力訓練」有相輔相乘嘅功效,兩者結合就能夠於更短時間嘅訓練中,令認知能力獲得更顯著、維持得更耐嘅提升,達到「腦部回春」嘅效果。

資料來源:Integrated cognitive and physical fitness training enhances attention abilities in older adults