文:MenClub 魏文青  
POSTED ON 10 Jun 2022

唔少奇幻故事中都會出現各種「魔藥」,當中又以飲一啖就能令對方愛上你嘅「愛情魔藥」最令各位男女心動。但原來愛情魔藥並唔係奇幻故事先有嘅嘢,有學者近日就公開指出,能幫助大家搵到愛情、又或令情侶再次墜入愛河嘅藥物,再快於三年內就會面世。但令人警覺嘅係,當中嘅成份可能會包括搖頭丸 (MDMA)?

圖片:《Harry Potter and The Chamber of Secrets》

來自牛津大學嘅人類學家Anna Machin博士日前參與英國Cheltenham科學節嘅講座時,就指出「愛情藥」唔單止真係可行,而且快將面世。「雖然會產生好多道德問題,但愛情藥肯定快將出現。我們對於愛情背後嘅神經化學已經知得夠多,以至可以整啲嘢出黎增加你搵到愛嘅能力——或者當你嘅感情出問題時,增加你繼續愛對方嘅機會。」

「而且肯定嘅係,愛情藥係商業性愛情研究嘅最前沿——你想唔想像到會搵到幾多錢?」

圖片:《Harry Potter and The Half Blood Prince》

Machin博士隨後指出,愛情藥嘅其中一種主要成份,可能係人稱「抱抱賀爾蒙」嘅催產素 (Oxytocin)。催產素能夠促使人們對外進行社交,而社交成功時體內又會釋放更多催產素而形成正循環。同時催產素會推動人們積極地與另一半建立穩定關係,增加信任、減少焦慮,甚至與性高潮有關。而另一種有可能出現嘅愛情藥主要成份,就係MDMA,即搖頭丸。Machin博士指出:「圍繞MDMA嘅道德問題會更多,所以可能需要更多時間先能推出市面。」

資料來源:Metro