文:MenClub 魏文青  
POSTED ON 07 Sep 2020

經過呢大半年,相信大家都慣咗出街會戴口罩嘅好習慣,亦明白戴口罩對防疫工作嘅重要性。但有時喺條街到都會見到人唔戴口罩,或者求其掛上塊面到就算,外國甚至有大型嘅「反口罩遊行」。當然每個人都有佢嘅理由,例如可能真係好焗好熱、可能身體唔容許,但根據多個研究,唔肯戴口罩嘅原因,有可能係因為佢哋有「反社會人格」。

巴西隆德里納大學 (Universidade Estadual de Londrina) 教授Fabiano Koich Miguel及其團隊早前做咗個簡單研究,搵黎近1,600名巴西成年人,並問佢哋「是否認為戴口罩 / 保持社交距離 / 常洗手是有需要的?」,然後再叫佢哋去做幾個人格測試,再按佢嘅嘅性格特徵 ,分成「同情組」及「反社會組」,結果發現「反社會組」嘅人更傾向拒絕跟隨戴口罩、保持社交距離等措施。

據研究團隊表示,反社會人格會比較自私、亦會忽略其他人嘅感受,同時佢哋亦傾向睇底疫情嘅嚴重性,於是就更不願意跟隨防疫措施。此結論與早前波蘭兩間大學所做嘅研究結果一致,而值得留意嘅係,其一個波蘭大學嘅實驗亦發現,反社會人格人士更傾向於囤積物資,因為佢哋更為自戀、自我中心而缺乏同情心,令佢哋覺得自己應該享受比別人多嘅嘢。

但必須要留意嘅係,以上研究只係發現到「反社會人格人士更傾向於唔戴口罩」,而唔係話「唔肯戴口罩就一定係反社會人格」,亦唔係話「肯戴口罩嘅就一定唔係反社會人格」,最重要嘅係就算有反社會人格都唔代表一定就係電影入面嘅連環殺人魔——即係《Sherlock》入面個Sherlock都係High-Functioning Sociopath,佢都冇殺人呀!

資料來源:Dailymail