POSTED ON 23 Dec 2020

疫情之下無得去旅行嘅呢段時間,大家被迫留港消費,而我同你都只可以盡量搵啲其他國家嘅餐廳、店舖,食食逛逛,就好似你見到Donki日日都大排長龍就知。而今次想同大家介紹番一間主打馬拉菜嘅餐廳「霹靂南洋」,聽個名都覺得充滿馬拉味啦。

「霹靂南洋」係位於「馬來西亞最美麗島嶼」邦咯島上嘅餐廳「南洋1957」首家海外分店,主打霹靂州美食,招牌菜為怡保芽菜雞,另有總廚家傳食譜炮製嘅「霹靂仁當牛腩煲」及「老巴剎肉骨茶」,當中加入香港人最愛元素 - 打邊爐,以砂煲奉上食完餸就可以加湯繼續拾下拾下。餐廳當然就仲有唔少馬拉風味菜,好似咖央多士、話梅桔仔冰、參巴辣醬炸豆腐等等啦。

而講番佢地個招牌菜怡保芽菜雞,真係非常唔錯,用上香港人至愛之一嘅三黃雞,皮滑肉嫩,真係無有得頂。而令人驚喜嘅係佢地嘅芽菜,條條都漲卜卜,食落爽甜相當Fresh,同傳統食開嘅真係非常唔同。

除左食物,亦睇得出餐廳裝修亦非常用心,佢地重現左馬來西亞著名街頭壁畫,咁你喺香港都可以打卡啦!

霹靂南洋

地址:旺角彌敦道575號 Ladder Dundas 5樓

電話:6971 7738

營業時間:中午12:00至晚上10:00